Saturday, December 28, 2013

జెండాపై కపిరాజు : పాటల పరిచయం

ఇవాళ అనగా డిసెంబర్28నవిడుదలయిన జెండాపై కపిరాజు పాటల పరిచయం!

తొలిపాట - ఇంతందంగా ఉందా లోకం...
షాషా, జీవీ ప్రకాశ్ (హమ్మింగ్ గొంతు), మరియు జావెద్ అలీ గాత్రం.
మంచి సంగీతం, ఇదే వరసలో కొన్ని ఇతర భాషా పాటలు విన్నాను కాబట్టీ, ఇది సొంత ట్యూన్ అని చెప్పలేను. అమ్మాయి పాట శ్రావ్యంగా ఉంది. అబ్బాయి పాడేపుడు అసహజత్వం కొట్టొచ్చినట్టు కనిపించింది. కొన్ని పదాలు పలకడంలో ఇబ్బంది, అస్పష్టత కనిపిస్తుంది.

రెండోది - డోంట్ వర్రీ బీ హ్యాపీ
జ్జైశ్రీనివాస్, ప్రియా హేమేశ్ గాత్రం.
మొత్తానికి సినిమా పాటల్లోకి రోజువారీ కుఱ్ఱకారు మాటాడుకునే మాటలు చొచ్చుకొస్తున్నాయనడానికి మరో ఉదాహరణ.
ఆ డప్పులు, సన్నాయి, ఈల, సాక్సఫోన్, ఘటం వాడకం ఈ మధ్య సినిమా పాటల్లో సామాన్యమయిపోయింది. 

మూడోది - మన అభిమాన గాయకుడు హేమచంద్ర పాడాడండోయ్
రాజాధిరాజాధి రాజా నేనే...
ఇది ఆ ఒక్కటి అడక్కు సినిమాలోని రాజాధిరాజాను నేనురా అన్న పాటకు దగ్గర పోలికతో ఉంది.
ఈ పాటంతా కూడా డప్పుల శ్రవణయోగమే!

నాల్గవది - తెలిసినది నువ్వంటే ఏంటో...
హరిచరణ్, సైంధవి గాత్రం
రొమాంటిక్ అని వినబోతే తత్త్వాలు చెప్పే పాట!

ఐదవది - భగవద్గీతలోని కొన్ని శ్లోకాలు
పాడింది హరిచరణ్ ట!
ఇవి విన్నాక ఒక రకమయిన విరక్తి కలుగుతుంది. అనుష్టుప్ ఛందస్సును ఎలా పాడాలో తెలీని గాయకులు ఉంటారా అని అనుకునేవాణ్ణి. కొన్ని శ్లోకాలయితే ఎక్కడ తుంచకూడదో అక్కడే తుంచారు. విసర్గం ఒకటి ఉంటుందని పాపం వీళ్ళకి తెలీదు! గీతను శ్రవణవిరుద్ధం చేస్సారు.

Saturday, December 14, 2013

కొమర్రాజు లక్ష్మణరావు వికీమీడియా పురస్కారం

విశ్వనాథ, తన  విశ్వనాథ పంచశతిని కొమర్రాజు లక్ష్మణరావు పంతులుగారికి అంకితమిస్తూ పుస్తకం మొదట్లో తొలి ఆంధ్రవిజ్ఞానసర్వస్వ నిర్మాతకిచ్చిన నీరాజనం!

అధునాతన సంస్కృతికిని
ప్రధానబీజమ్మ వీవు పాండిత్యపయో
నిధి వీవు మార్గదర్శక
సుధారుచివి నిన్ను మఱవఁజొచ్చిరి యాంధ్రుల్

ఆంధ్ర విజ్ఞానసర్వస్వ మద్ది నీవు
మొదలువెట్టితి మా కది కుదురలేదు
ఆంగ్ల విజ్ఞానసరస్వ మట్లు దాని
వెలయఁజేతుము క్షమియింపవే!మహాత్మ!

నీ రచిత వ్యాసంబు లు
దారంబగు నీదు నాత్మదర్పణముల్ నీ
సారమతి ముదగల్గిన
యారంభంబులకు విజయ మగుత మహాత్మా!*


ఇదే స్ఫూర్తితో తెలుగు వికీపీడియా సభ్యులలో కొందరిని తెలుగు వికీపీడియా దశాబ్ది సందర్భంగా విశిష్ట వికీపీడియన్ గా గుర్తించి సన్మానింప తలఁచాము. ఆసక్తి ఉన్నవారు ఈ నిర్ణయంలో పాలు పంచుకోగలరు.

https://te.wikipedia.org/wiki/%E0%B0%B5%E0%B0%BF%E0%B0%95%E0%B1%80%E0%B0%AA%E0%B1%80%E0%B0%A1%E0%B0%BF%E0%B0%AF%E0%B0%BE:%E0%B0%95%E0%B1%8A%E0%B0%AE%E0%B0%B0%E0%B1%8D%E0%B0%B0%E0%B0%BE%E0%B0%9C%E0%B1%81_%E0%B0%B2%E0%B0%95%E0%B1%8D%E0%B0%B7%E0%B1%8D%E0%B0%AE%E0%B0%A3%E0%B0%B0%E0%B0%BE%E0%B0%B5%E0%B1%81_%E0%B0%B5%E0%B0%BF%E0%B0%95%E0%B1%80%E0%B0%AE%E0%B1%80%E0%B0%A1%E0%B0%BF%E0%B0%AF%E0%B0%BE_%E0%B0%AA%E0%B1%81%E0%B0%B0%E0%B0%B8%E0%B1%8D%E0%B0%95%E0%B0%BE%E0%B0%B0%E0%B0%82

Friday, November 15, 2013

సుపరిచిత గొంతు

ఇవాళ పొద్దున పాల వాడి దగ్గర ఒక వింత సంఘటన చోటు చేసుకుంది. మాకు ఇక్కడ కోరమంగలలో పాలూ, పళ్ళూ, కూరగాయలు అన్నీ ఒక కొట్టులోనే ఉంటాయి. నేను పాలు కొనేసి తిరిగి వస్తుంటే, పరిచయమున్న ఒక గొంతు వినిపించింది - అరటి పళ్ళ కోసం బేరమాడుతున్నాడో పెద్ద మనిషి, కొంచెం ముఖం చూసి ఏమీ గుర్తు రాకపోయే సరికి, ఎవరో ర్యాండం మనిషి అని అనుకుని రూం కి వచ్చేసాను. కానీ రూంకి వచ్చి కాఫీ పెట్టుకుంటుంటే గుర్తొచ్చింది ఆ వాయిస్ ఎవరిదో. చాలా పరిచయమున్న వాయిస్. మూడో తరగతి నుండి, తొమ్మిదో తరగతి వరకూ రోజూ మార్నింగ్ అసెంబ్లీలో వింటూ వచ్చిన వాయిసాయే! నేను తొమ్మిదో తరగతిలో ఉండగా కాసర్గోడ్ కి ట్రాన్స్ఫర్ మీద బదిలీ అయి వెళ్ళారు. ఈ మధ్య బెంగుళూరు వచ్చిన కొత్తలో వాళ్ళబ్బాయిని కలిసాను, నాకన్నా ఒక సంవత్సరం సీనియర్ ఇతను. స్కూల్ లో ఏ క్విజ్ పోటీ జరిగినా, రూపకం జరిగినా నేనూ, ఈ అభిజిత్ భయ్యా, ఇంకా తేజశ్విని దీదీ అని (ఈమె ఎనిమిదో తరగతిలో ఉండగా వీళ్ళ నాన్నకు మాస్కో ట్రాన్స్ఫర్ అయింది, ఈమె కూడా ఇప్పుడు బెంగుళూరులోనే!) మేం ముగ్గురం టీం అప్ అయితే ప్రత్యర్ధులుండే వారు కాదు. గుర్తొచ్చి అభిజిత్ భయ్యాకి కాల్ చేసాను, అవును సార్ ఇప్పుడు సిలిగురిలో ఉంటున్నారు నన్ను చూద్దామని వచ్చారు అన్నడు. అయ్యో, ఆయనను ప్రత్యక్షంగా గుర్తించల్క పోయానే అని దిగులు పడి, తిరిగి ఎప్పుడు కలవవచ్చో కనుక్కున్నాను, వచ్చే వారం ఖాళీ అన్నారు. ఆయన్ని కలిసొచ్చాక ఆ విశేషాలతో ఇంకొక పోస్టు!

Wednesday, October 30, 2013

తెలుగు పుస్తకాల యూనీకోడీకరణపై సింపోజియం

నిన్న హైదరాబాదులోని పబ్లిక్ గార్డెన్స్-జూబిలీ హాల్‍లో "తెలుగు పుస్తకాల యూనికో(క్రో)డీకరణ" పై సింపోజియం జరిగింది.
 ఇది ఆంధ్రప్రదేశ్ ప్రభుత్వం సమాచార సాంకేతిక శాఖ, అధికార భాషా సంఘం మరియు సిలికానాంధ్ర - ఈ మూడు సంస్థల సంయుక్త ఆధ్వర్యంలో జరిగింది. పీవీఆర్కే ప్రసాద్ గారు లాంటి ఎందరో ప్రముఖులను మొదటి సారి చూసే అవకాశం కలిగింది.

సదస్సులో మొదటి ప్రశ్న ఏ ఏ పుస్తకాలను యూనీకోడ్ లో అందుబాటులోకి తేవాలి అని. దానికి వచ్చిన సమాధానాలు నాకు గమ్మత్తుగా అనిపించాయి: సూచనలు - ఆంధ్ర మహాభారతం, భాగవతం, క్షేత్రయ్య పదాలు మొ॥
- ఇవన్నీ ఇప్పటికే తెలుగు వికీసోర్స్( te.wikisource.org ) లో అందుబాటులో ఉన్నాయి. మనకు కావాల్సిన విధంగా HTML, pdf, doc, txt, epub, mobi మొదలగు రూపాలలో పుస్తకాన్ని దింపుకునే మార్గం కూడా ఇప్పటికే అందుబాటులో ఉన్న వికీసోర్స్ లో మహాభారతం(వ్యాస, కవిత్రయ), రామాయణం(మొల్ల, వాల్మీకం), కవిత్వం(నీతిచంద్రిక, ఊర్వశి, గురజాడ గారి కవిత్వం, చలం కవిత్వం), నాటకములు(పూర్ణమ్మ, కన్యాశుల్కం, మిణుగురులు మొ॥), పురాణాలు(భాగవతం, పద్మపురాణం), వేదాలు(ఋగ్వేదం అన్ని మండలాలు, అధర్వణ వేదం అన్ని కాండాలు, సామవేదం అర్చికలు, శుక్ల యజుర్వేద అధ్యాయాలు, కృష్ణ యజుర్వేదం కొంత భాగం)-తెలుగులిపిలో, క్షేత్రయ్య పదాలు, సంకీర్తనలు, స్తోత్రములు, శతకములు, తెలుగులో కురాన్, ఇంకా ఆంధ్రుల చరిత్రము మొదలు తెలుగువారితో సంబంధమున్న స్వేచ్ఛా లైసెన్స్ లేదా పబ్లిక్ డొమెయిన్ లో ఉన్న ఎన్నో పుస్తకాలున్నాయి.
వికీసోర్స్ మొదటి పేజీ
ఇంకా ఎన్నో పుస్తకాలు తెచ్చేందుకు కృషి జరుగుతుంది. మీరూ ఇందులో పాలుపంచుకోవచ్చు. వికీసోర్స్ మనందరిలాంటి ఔత్సాహికులు రాసే స్వేచ్ఛా గ్రంథాలయం. వికీసోర్స్ లో ప్రూఫ్ రీడ్ పొడిగింత వాడి చాలా సులువుగా పాఠ్యాన్ని టైపు చేసుకోవచ్చు.
వికీసోర్స్ లో ఇప్పటికే ఉన్న పుస్తకాల వర్గాలు

ప్రూఫ్ రీడ్ ఎక్స్టెన్షన్ వాడుకలో

ప్రూఫ్ రీడ్ పొడిగింత టైపుచేస్తున్నపుడు

ప్రూఫ్ రీడ్ పొడిగింత, గులాబీ పెట్టెలోనిది మనం టైపు చేసే పాఠ్యం, పచ్చ పెట్టెలోది స్కాన్ పుస్తకపు పేజీ, ఎరుపు వృత్తంలోనిది టైపు పద్ధతిని ఎంచుకునే ఉపకరణం

epub గా ఎగుమతి చేసేందుకు


ప్రతి పుస్తకాన్నీ పీడీఎఫ్గా, ముద్రణకు అనువుగా దింపుకోవచ్చు, అలానే ఎక్కువ పుస్తకాలను ఒకే పుస్తకంగా రూపొందించవచ్చు 

వికీసోర్స్ మాత్రమే కాక ఎన్నో ఇతర జాలగూళ్ళలో ఉన్న ఎన్నో పుస్తకాలు కూడా సభికులు యూనికోడ్ లోకి రావాలి అని అడగటం గమనార్హం.
 ఏదయినా చర్చకు/సభకు వెళ్ళే ముందు అవి ఇప్పటికే అందుబాటులో ఉన్నవో లేదో నిర్ధారించుకుని అడగాలి కదా! అది వేరే విషయం అనుకోండి.

మరికొందరు అడిగినవి - గణితసార సంగ్రహం, విజ్ఞానేశ్వరం, వ్యాకరణాలు, ఛందస్సు, నందకరాజ్యం, మొ॥, జానపదుల మాటలను భద్రపరిచి అందులోనుండి వారి వాడుక పదాలను సేకరించాలని శ్రీరమణ గారో, ఇంకెవరో అడిగారు. ఇవి బాగున్నాయి.
అయితే ఏ ఒక్కరూ కూడా సమకాలీనుల పుస్తకాలను గుర్తించలేదు!
స్వేచ్ఛా లైసెన్స్‍ల అవగాహన రచయితలలో పెరగాలి. వారి కాపీరైట్లు వారితోనే ఉంచుకుని హక్కులు ప్రచురణకర్తలకు ఇవ్వటానికి బదులు సమాజానికి ఉపయోగపడే విధంగా క్రియేటివ్ కామన్స్ లాంటి లైసెన్స్ ను ఆపాదించుకోవడం మన రచయితలూ నేర్చుకోవాలి.

ఒకటి రెండు అంశాలు, తెలుగులో టైపు చేయటం ఎలా, యూనికోడ్ మా డీటీపీ వాడికి తెలీదు అనే కొన్ని ఎప్పుడూ ఉండే సాగతీత అంశాలు తప్ప మిగితా చర్చ అంతా బాగానే సాగింది.

నేను ఒక ప్రదర్శన(presentation) తయారుచేసి తీసుకెళ్ళాను. జరుగుతున్న చర్చలకి నా ప్రదర్శన జరక్కపోవచ్చు అనుకుని, నా ప్రదర్శన ఇంకా వీవెన్ ప్రదర్శనలోని స్లైడ్స్ డిస్ప్లే చేయటం మొదలుపెట్టాను. ఆఖరున ఒక 20 నిమిషాలు నాకూ వీవెన్ గారికి అవకాశం వచ్చింది, కానీ అప్పటికే డిజిటైజేషన్ కి సంబంధించిన అన్ని అంశాలు అందరూ చర్చించేసారు, అవి మినహా ఉన్న సమయంలో చెప్పదగినవి చెప్పేసాను. నా ప్రదర్శన కింద ఇవ్వబడింది.

ఈ సింపోజియంలో సిలికానాంధ్ర వారి telugupustakam.org అనే వెబ్సైట్ లాంచ్ చేసారు. ఇందులో కొన్నిపుస్తకాలు ఇప్పటికే అందుబాటులో ఉంచారు. నేను ఆసక్తిగా ఎదురుచూసేది - ఈ సైటులోకి త్వరలో వచ్చి కొలువుండబోయే టీటీడీ వారి పుస్తకాలు, కొన్ని వర్సిటీలు సంస్థల పుస్తకాలు. ఇంకా తెలుగు కోర్పస్ ప్రాజెక్టు సన్నాహాలు కూడా చేసారు. 

Friday, September 20, 2013

వికీపీడియా అంటే ఏమిటి?

http://te.wikipedia.org , తెలుగు వికీపీడియా - 50 వేల పైబడి వ్యాసాలు, 100 కు పైగా సంపాదకులు, వేలల్లో బొమ్మలు, ఆంధ్ర ప్రదేశ్ లోని ప్రతీ గ్రామానికీ, తెలుగులో విదుదలయిన ప్రతి చలనచిత్రానికీ ఇక్కడ ఓ పేజీ ఉంది. ఎవరయినా రాయగల స్వేచ్ఛా విజ్ఞాన సర్వస్వంగా చెప్పబడుతున్న ఈ వెబ్సైటులో ఎవరయినా రాసివేస్తే మరి సమాచార ప్రామాణికత ఏమిటి? మనం రాసినది మరొకరు తీసివేసి ఆ స్థానే ఇంకేదో రాసేసే వెసులుబాటు ఉన్నపుడు వికీపీడియాలో విషయాన్ని ఎందుకు చేర్చాలి?
ఇలాంటి ఎన్నో ప్రశ్నలు వికీపీడియాను మొదటి సారి సందర్శించే వారికి ఉంటాయి.
మరి నిజానిజాలు ఏమిటి?
ఇవి తెలుసుకోవాలంటే వికీపీడియా మూలస్థంబాల గురించి తెలుసుకుందాం. చేర్చిన సమాచారం ఈ అయిదిటిలో ఏ ఒక్క నియమానికి కట్టుబడి లేకపోయినా అది నిర్వాహకులు/అధికారులు/ఇతర వాడుకరులు తీసివేయవచ్చు.
మూలస్థంబాల గురించి ఇక్కడ చూడండి.
ఇక మనకు ఇష్టమొచ్చింది ఏదయినా రాసేయవచ్చా?
మనకు నచ్చిన విషయాల రాసుకునేందుకు బ్లాగులు ఇప్పటికే ఉన్నాయి. వికీపీడియాలో ఒక విజ్ఞానసర్వస్వంలో ఉండాల్సిన విషయాలు మాత్రమే చేర్చాలి. మీరు రాసే ప్రతి వాక్యం-పదం ఐదు మూలస్థంబాలకు జల్లెడ పట్టండి. అలా మెరుగయి వచ్చిన సమాచారం ఏదయినా మీరు చేర్చవచ్చు.
ఆంగ్ల వికీపీడియాలో చేర్చే ప్రతి వాక్యానికీ ప్రామాణికత కోసం ఏదో ఒక ఋజువును ఉదహరించాలి. ఇది తెలుగుకు కూడా అన్వయించుకోవాలి. కానీ మూలాలుగా ఋజువు చూపేందుకు మన తెలుగు పత్రికలు/వనరులకు అంతర్జాలంలో శాశ్వతలంకెలు అందుబాటులో ఉండవు. మహా అయితే ఓ సంవత్సరం పాత వార్తలు వరకూ అందుబాటులో ఉండొచ్చు. అందువలన ఈ నిబంధన తెలుగుకు సహజంగానే సడలించబడింది.
తెలుగులో మీరు విషయాలను చేర్చవచ్చు. అవి సార్ధకంగా ఉన్నంత వరకూ మార్పులకు లోను కావు!
ఆయా విషయాలు కాలానుగుణంగా మారినపుడు, సహజంగానే వ్యాసాలలో మార్పు వస్తుంది.
అయినా ఒకవేళ ఎవరయినా అనవసరంగా మీరు రాసిన విషయాన్ని మార్చినా, అది తిరిగి యధాస్థానానికి తీసుకొచ్చే వెసులుబాటు తెవికీలో ఉంది.
అందుకని అపోహలు మాని తెవికీలో సమాచారం చేర్చడం ప్రారంభించండి.



Tuesday, September 10, 2013

వేయి పడగలు-విశ్వనాథ మరియు నేనూను

ఒక చిన్ననాటి జ్ఞాపకం
ఒక చిన్న పుస్తకం, మామయ్య పుస్తకాల్లో కనిపించింది. అందులోని కొన్ని; కాదు కాదు చాలా పదాలు నాకు అర్ధమవలేదు, ఆ పుస్తకాన్ని ఒక పక్కన పెట్టేసాను.
***
పాత పుస్తకాల దుకాణంలో ఒక లావుపాటి పుస్తకం ఉంది, తెరిచి చూడాలేదు తెలుగు కాబట్టీ - ఇది నేను తొమ్మిదో తరగతి చదివే రోజుల సంగతి. స్కూల్ లో తెలుగు లేదు కాబట్టీ తెలుగు చదవాలనే ఆసక్తి - ఎక్కువ బొమ్మలున్న చందమామలాంటి పుస్తకాలకే పరిమితం, బొమ్మల్లేని పుస్తకాలు సుద్ద-దండగ అనిపించేవి. ఆ పుస్తకం వేయిపడగలు! అదే మొదటి సారి చూడటం.
***
దూరదర్శన్ లో సుమ ఒక సీరియల్ లో వచ్చేది. అందులో భర్త ఉప్పివ్వమన్నప్పుడు లవణం అని అంటుంది. ఈమేంటి ఉప్పుని లవణం అంటుంది అని హేళనగా చెప్పుకున్న రోజులు; ఉన్నట్టుండి ఒకమ్మాయి జుట్టు విరబోసుకొని వేపమండలతో పరుగెడుతున్న సన్నివేశం చూసి భయపడటం - పదో తరగతి పరీక్షల తరువాతి శెలవు దినాలు. అది వేయి పడగలు సీరియల్!
 ***
ఇంజనీరింగ్ చదువుతున్న రోజులు, కాలేజీ ఉన్న ఊళ్ళో ఇతర వ్యాపకాలు లేకపోవడంతో జిల్లా గ్రంథాలయంలో చేరి అన్ని రకాల తెలుగు పుస్తకాలు చదువుతున్న రోజులు. స్నేహితుల ప్రభావం వల్ల ఎన్నో విలువయిన పుస్తకాలు తెలుగువీ-ఇంగ్లిష్ వీ కనుగొని చదివి మురిసిపోతున్న రోజులు. వేయి పడగలు పుస్తకం గురించి ఇక్కడ స్నేహితులలో ఒకడు కచ్చితంగా చదవాల్సిన పుస్తకం అనడంతో పుస్తకంపై కాస్త ఆసక్తి కలిగింది, కానీ పుస్తకం ఎప్పుడూ ఎవరో ఒకరి ఖాతాలో ఉండేది - మళ్ళీ అనాసక్తి.
***
2009 పుస్తక ప్రదర్శన, మొదటిసారి ఇలాంటి ప్రదర్శనకు రావటం జరిగింది. ఈ-తెలుగు సభ్యులను కలవడం - వీవెన్ ని అంతకు ముందే కలిసినా, సుజాతగారినీ, సతీశ్ యనమండ్ర గారినీ, చక్రవర్తి గారినీ కలిసింది మొదట అక్కడే, పక్కనే నవోదయ స్టాల్ లో మొట్ట మొదటి సారి పూర్తి పుస్తకం చూసాను - వేయి పడగలు విశ్వనాథ సత్యనారాయణ అనే పేర్లను, కొందామని పుస్తాం చేతులోకి ఎత్తుకొని, ధర చూసి తిరిగి పెట్టేసాను. విద్యార్థులకు కథల పుస్తకాలు చదువుకునేందుకిచ్చే డబ్బుకు ఆ పుస్తకం అందలేదు మరి-ఆ రోజుల్లో!
***
2010 పుస్తక ప్రదర్శన సంపాదన చేతికొచ్చిన రోజులు, ఈ-తెలుగు స్టాల్ కి ఇంతకు ముందు ఒక రోజు వెళితే, ఈ మారు వారం రోజులు వెళ్ళిన సందర్భం, కానీ ఏ స్టాల్ లోనూ వేయిపడగలు దొరకలేదు, జీతం అందిన మొదటి రోజు నుండీ సరిగ్గా ఆరు నెలలు, పుస్తకం కొందామని తెచ్చిన డబ్బుతో హ్యారీ పాటర్, మరికొన్ని పుస్తకాలు కొని నిరాశతో ఇంటికి చేరాను.
ఒక రోజు పుస్తక ప్రదర్శనకు భరణి గారు రావడం, నా ల్యాపీలో కౌటిల్య తన బ్లాగులో విశ్వనాథ గారి పై రాసిన విషయాలు సిగ్గుపడుతూ భరణి గారికి చూపించడం గమనించాను. ఈ కుఱచబ్బాయితో స్నేహం చేసి ఎలాగయినా వేయిపడగలు సాధించి చదవాలనుకున్నాను. 
తరువాతి రోజు అడిగితే ప్రస్తుతం నా వద్ద లేదు గుంటూరొస్తే ఇస్తా అన్నాడు. 
లేదు నాకిప్పుడే కావాలి అని నిలదీస్తే నాగ ప్రసాద్ అనే సాములోరు వద్ద ఉంది తీసుకో అన్నాడు.
***
పుస్తక ప్రదర్శన ముగిసింది. ఈ నాగ ప్రసాద్ విలాసం అగమ్యగోచరంగా ఉంది.
మొత్తానికి ఒక రోజు సాములోరు ఉండే స్థావరానికి దగ్గరలో ఉన్న హాస్టల్లో నేను చేరడంతో ఏ జన్మ సుకృతి ఫలమో వేయిపడగలు మొదటి సారి నా చేతికందింది. అందిందే తడవుగా మొదటి మూడు అధ్యాయాలు చదివేసాను.
భాష కొత్తగా-వింతగా ఉంది, చదవగా చదవగా మరింత రుచించింది. కానీ నాలుగవ-అయిదవ అధ్యాయాలు కొంచెం మందచదువుగా చప్పగా సాగాయి. ఎనిమిదో అధ్యాయం వరకూ చదివాక పుస్తకం కొన్ని రోజులు కనపడకుండా పోయింది.  చెప్పలేనంత దిగులు వచ్చింది. రోజువారీ పనుల్లో మళ్ళీ పడిపోయి పుస్తకం సంగతి మరిచాను.
మళ్ళీ కొన్ని రోజులకి పుస్తకం దొరికింది మందకొడిగా చదువుతూ ఆసక్తిగానే మొత్తానికి ఒక ఆరు నెలల్లో పుస్తకం చదవడం ముగించాను.
గుంటూరు తరచు వెళ్ళడం మొదలయ్యాక కుఱచబ్బాయిని కలవటం ఎక్కువయింది. విశ్వనాథ గురించిన జ్ఞానమూ పెరిగింది. డీఎల్ఐ, కౌటిల్య, పాత పుస్తకాల కొట్ల పుణ్యమా అని విశ్వనాథ వారి సాహిత్యం మరింత చదవగలిగాను.
వేయిపడగలు ఎంత నచ్చిందంటే, ఇప్పటికీ ఎవరయినా ఏదయినా తెలుగు పుస్తకం చదవడానికి సలహా అడిగితే మొదటగా ఈ పుస్తకాన్నే చదమంటాను.
మా ఇంట్లో మామయ్యతో-అమ్మతో చదివించాను. ఓ మూడు కాపీలు కొని మరీ స్నేహితులకిచ్చాను కూడా.
ఇప్పటికీ ఏదో ఆలోచిస్తూ వేయిపడగలు తెరిచి చదివితే ఆ రోజు తలతొలిచేస్తున్న సమస్యకు సమాధానం దొరుకుతుంది.
విశ్వనాథ వారు రాసిన ఎన్ని గ్రంథాలున్నా, అన్నిట్లో పెక్కు గొప్పదీ వేయి పడగలు.
నా అవగాహనలో పుస్తకం చదవకుండానే పుస్తకం పై విమర్శలు గుప్పించొచ్చు అని నిరూపించిన పుస్తకాలలో వేయిపడగలు మొదటిది, రెండవదయిన చెలియలికట్ట కూడా విశ్వనాథ రచనే అవటం గమనార్హం. 
వేయిపడగల రచనా శైలి చాలా సులువు, భాష అలవాటయ్యాక చదవనలవవుతుంది.
పాత్రలు మనకూ, మన జీవితాలకూ ఎంతో దగ్గరగా ఉంటాయి. ఒక్కో పాత్రపైనా మరో పుస్తకమే రాయవచ్చు. 
ప్రతి సన్నివేశాన్ని ఊహించుకొని సంతోషించి, నాలో నేనే నవ్వుకున్న రోజులున్నాయి.
ఒక తెలీని ఉద్వేగం వేయిపడగలు చదివిన ప్రతి సారీ నాలో కలుగుతుంది.
ఒకానొక వ్యక్తి ఒక రచయిత రచనొకటి చదివి మిగితా రచనలు దీనికి తీసిపోయేవిగా ఉంటే ఆ రచయితను నిందించవచ్చనే భయంతో సదరు రచయిత మిగితా రచనలు చదవలేదుట. వేయిపడగల విషయంలో నేను మొదట అదే అనుకున్నాను. కానీ కామకోటి వారి సైట్ లో నా రాముడు చదివాక అలాంటి ఆలోచనలకి దూరంగా నిలవాలనుకున్నాను.

హాహాహూహూ, విష్ణుశర్మ ఇంగ్లిష్ చదువు, మా స్వామి, ఆంధ్ర ప్రశస్తి, ఏకవీర, ప్రళయనాయుడు, చిన్న కథలు ఇప్పటి వరకూ చదివిన ఇతర రచనలు.
2011 లో ప్రపంచ తెలుగు రచయితల మహాసభలకు విజయవాడ వెళ్ళినపుడు, కస్తూరి మురళీకృష్ణ గారు, కోడిహళ్ళి మురళీమోహన్ గారూ, శ్రీకాంత్ గారూ, నేను ఇంకా కుఱచబ్బాయి కౌటిల్య కలిసి విశ్వనాథ గారి ఇంటిని సందర్శించాము కూడా. అక్కడ మురళీకృష్ణ గారూ, మురళీమోహన్ గారి నుండి విశ్వనాథ వారి గురించి మరింత తెలుసుకోగలిగాను.
ఆ ఇంటిని స్మారకం చేయాలని కృష్ణాజిల్లా రచయితల సంఘం వారు ప్రతిపాదిస్తే, అది తిరస్కరించి అక్కడ ఒక ప్రింటింగ్ ప్రెస్ ను నడుపుతూ ఇటివలే విశ్వనాథ వారి జైవిక వారసులు ఆ ఇంటి వద్దే ఉంటున్నారని తెలిసింది. త్వరలో వారి రచనలు అందరికీ అందుబాటులో తెస్తామని మాటిచ్చారట కూడానూ!
ఆ మహానుభావుడి రచనలు జనబాహుళ్యానికి చేరేలా చేయటం ప్రతి తెలుగువాడీ కర్తవ్యం.
కొన్ని కారణాల వలన వారి రచనలు అన్నీ చదవలేకపోయాను.
మిగితా రచనలు కూడా కుఱచబ్బాయి దయతో చదవగలనని ఆశిస్తున్నాను.

సద్గురు ఒడిలో

ఈశా యోగాలోకి ప్రవేశించాక జీవితంలో ఎన్నో కొన్ని అద్భుతాలు చూడగలిగాను.
ఆధ్యాత్మికంగా, ఆలోచనాపరంగా, విశ్వాసాలపరంగా మరింత పరిణితి చెందగలిగానని అనుకుంటున్నాను.
పరిచయమయిన రోజు నుండే నాకూ, అన్నయ్యకీ రాముడు-కబీర్ కీ మధ్య జరిగినంత తీవ్రంగా చర్చలు జరిగేవి, మధ్య మధ్యలో సద్గురు గురించి ప్రస్తావిస్తూ, ఈశాలోకి రమ్మని ఎన్నో మార్లు ఆహ్వానాలంపాడు కూడా.
నేను చూసీ చూడనట్టూ వదిలేసేవాడిని.
ఒక సందర్భంలో సీరియస్ గా చెప్పి ఈ ప్రోగ్రాం కి వెళ్ళు లేదంటే... అనే స్థాయికి వచ్చాడు, నొప్పించడం ఇష్టం లేక ఒప్పుకున్నాను. ఆ ఒక్క అంగీకారమే ఎన్నో అద్భుతాలను ఆవిష్కృతం చేసింది. ఇన్నర్ ఇంజనీరింగ్ కార్యక్రమం అనమాట! ఆగస్టు 2011 లో. ఒక పాశ్చాత్య అమ్మాయి మాకు అధ్యాపకురాలు, అయిదు రోజుల కార్యక్రమం; ప్రతి రోజూ మూడు గంటలు, ఓ గంట యోగాసనాలకు సంబంధించిన విషయంపై కార్యశాల, మరో రెండు గంటలు ఆధ్యాత్మిక, ప్రాపంచిక విషయాలపై చర్చ/ఆట/ప్రవచనం ఉండేవి. అసలే ఈ పడమరమ్మాయి ఏం మనకేమి చెప్పిద్ది అన్న విసుగుతో మొదటి రెండు రోజులూ కొంచెం గర్వంగా నిర్లక్ష్యంగా ఉండే వాడిని - అంటే ఆలస్యంగా వెళ్ళటం, చెప్పినది అనాసక్తిగా పాటించడం, కానీ మూడో రోజు నన్ను గమనించి నా వద్దకు చేరి ప్రత్యేకంగా మాట్లాడిందా టీచరమ్మ! ఆ మాటల్లో తెలీకుండానే ఆమె అంటే ఓ గౌరవం వచ్చింది. సద్గురు చెప్పే ప్రవచనాలు కూడా రుచించాయి, ఆదివారం మొత్తం రోజూ రావాలన్నారు. ఆ రోజు మరొక ముఖ్యమయిన పని, అది మానుకుని ఇటు వస్తన్నానే అని మరొక అనాసక్తి. పొద్దున్నే ఆరింటికి రమ్మన్నారు, సైబర్ టవర్స్ ముందున్న ఎన్ఐఎఫ్టీకి రమ్మన్నారు. సరే కదా, ఏదో పూజో సూర్య నమస్కారమో చేయిస్తారని వెళ్ళాను. వెళ్ళాక నాకు షాక్, అందరూ గెంతులేస్తున్నారు, ఆడతన్నారు, ఫ్రిస్బీ, ఫుట్బాల్, త్రో బాల్, ఇలా చాలా ఆటలు ఆడించారు. సంవత్సరాల తరువాత(మన విద్యా విధానాలు నిందనీయం) ఆడే అవకాశం వచ్చాక ఆగుతామా? ఏదో ఒక ఆటలో విజేతను కూడా నేనే(అంకెలు లెక్క పెడుతూ ఒక్కొక్కళు బయటకు వెళ్ళే ఆటనుకుంటా)!
ఆ తరువాత ఎనిమిదిన్నర కల్లా మళ్ళీ ఆధ్యాత్మికంలోకి - శాంభవీ మహాముద్ర ఉపదేశం జరిగింది. ఆపై మునుపెన్నడూ లేనంత దీర్ఘమయిన(సమయానుసారం కాదు) లోతయిన ధ్యానం లోకి వెళ్ళాను.
మధ్యాహ్న విరామ సమయానికి గానీ నేను ధ్యానం నుండి బయటకి రాలేదు.  
మధ్యాహ్నం భోజనానికి ఆశ్రమాహారం, కానీ ఎంతో రుచిగా ఉంది.
ఆపైన మరికొన్ని సందేశ ప్రవచనాలతో రోజు ముగిసింది, ఆ ధ్యానంలో ఉన్న లోతుకి మిగితా ప్రపంచం వ్యర్థమనిపించింది నాకు! కాని పని పెద్ద భారమనిపించలేదు.
తరువాతి రెండు రోజులూ మామూలుగా ఇంతవరకూ నేర్చుకున్న విషయాలు నెమరు వేసుకోవడంతో ముగిసింది.
మొత్తానికి అయిదు రోజులు మంచి ఫలితాన్నిచ్చింది.
ఆరంభశూరత్వంలో రోజుకు రెండు-మూడు మార్లు సాధన చేసాను.
నేటికి రోజుకొకసారికి దిగజారాను :(
ఆ తరువాత ఈశా యోగా జీవితంలో ఒక భాగమయినా పెద్దగా ఆశ్రమం గురించి నేను పట్టించుకోలేదు; తరువాతి స్థాయి ప్రోగ్రాములు చేసేందుకు పెద్ద ఆసక్తి కూడా చూపలేదు!
సరిగ్గా ఇది అయిన సంవత్సరమున్నరకు అన్నయ్య దేశానికి విజయం చేసాడు. ఇక అన్నయ్య సమక్షంలో తప్పదుగా ఆశ్రమానికి వెళ్ళాను.
మొదటి సారి వెళ్ళడం అదే.
కోవైకి ఓ 30 కిమీల దూరంలో ఆశ్రమం. ఇదీ మిగితా ఆశ్రమాల్లానే అనుకున్నా వెళ్ళే వరకూ.
వెళ్ళాక నా ఆలోచనలన్నీ పటాపంచలు.
ధ్యానలింగం-లింగభైరవి ఆలయాలు, తీర్థకుండం, ఆశ్రమం చుట్టూ వెళ్ళింగిరి కొండలు, ఆహ్లాదకరమయిన వాతావరణం, ఒక రెండు రోజులకి వెళ్ళాను, కానీ తిరిగి రావాలనిపించలేదు.
రోజంతా ధ్యానలింగాలయంలో ధ్యానంలో ఉండిపోవాలనిపించేది.
తిరిగి వచ్చేసి మళ్ళీ రొటీన్ లైఫ్ లో పడ్డాను.
తిరిగి ఎప్పుడు ఆశ్రమానికి వెళ్ళాలా అని ఆశ్రమం జ్ఞాపకాల్లో ఉండేవాణ్ణి.
నిరడు నుండీ ఇవాళ్టికి దాదాపు ఓ అయిదు మార్లు వెళ్ళాను ఆశ్రమానికి.
అన్నయ్య, బ్లాగుల్లో మరో ఫ్రెండ్ వస్తున్నారని తెలిసి యజమాని ఒడిలో అన్న కార్యక్రమానికి వెళ్ళాను. రెండు రోజులపాటూ ఆశ్రమంలో సద్గురు సమక్షంలో ఉంటుంది ఈ కార్యక్రమం.

రెండేళ్ళలో ఆశ్రమంలో ఎన్నో మార్పులు వచ్చాయి. కొత్త భిక్ష హాల్, ఆదియోగి ఆలయం, సూర్యకుండం కొత్తగా వచ్చినవి.

ఆలయాలను దర్శించి, సద్గురు ఒడిలోకి చేరాను.
రెండు రోజుల పాటూ ఎన్నో కబుర్లు, జోక్స్, సందేశాలు, ఉపదేశాలు, జాగ్రత్తలు, కథలతో ఇట్టే అయిపోయింది సమయం.
యోగనమస్కారమనే ఒక విశిష్ట సడలిజ యోగక్రియ ఇక్కడందిన బహుమతి.
రోజూ చేసే సాధనకన్నా ఆశ్రమంలో ఆదియోగి ఆలయంలో చేసిన సాధన మరింత ఉత్తేజపరిచేదిగా అనిపించింది.
తెలీకుండానే రెండు రోజులు గడిచిపోయాయి.
మళ్ళీ సద్గురు ఒడిలోకి చేరే రోజు కోసం వేచి ఉండాలి!

Wednesday, July 17, 2013

పసిఫిక్ రిమ్ అనబడే ఓ ఆంగ్ల చిత్రరాజము

బ్లాగ్మిత్రుల ప్రోద్బలంతో వారి సహవాసంలో, మామూలుగా థియెటర్ కి వెళ్ళి సినిమాలు చూడని నేను, బెంగుళూరులోని బెల్లందూరు సెంట్రల్ లో ఈ సినిమా చూడటం జరిగింది. 3D సినిమా అనుకొని వెళితే ఆ హాలువాడు అటూ ఇటూ కత్తిరించి తెరలో మూడులో రెండితల తెరపైనే సినిమాను నడిపాడు. చిన్న తెర, పైగా అటూఇటూ కత్తిరించేసి, ఓ పెద్ద సైజు 40" స్క్రీనున్న హోం థియేటర్ లో సినిమా చూసిన ఫీల్ వ్వచ్చింది. ఇక ఆ థియేటర్ లోని ఇతర సదుపాయాలు పరమ చెత్తగా ఉన్న విషయం గుర్తుంచుకోవాలి. సినిమా తెరల ప్రాంగణంలో ఒక పెద్ద కొలాజ్ ఏర్పాటు చేసాడు. అది అందరు సినీ తారలను పెట్టాలని చేసాడో, లేక ఆ హాలులో ఆడిన సినిమాల నటీ నటూల ఫుటోలో తెలీదు కానీ, ఫుటోల ఎంపికలో చాలా లోటు ఉంది, మా అన్నయ్య తన అభిమాన నటుడి ఫుటో కోసం ఓ నాలుగు మార్లు అన్ని ఫుటోలు పరికించి లేడని నిర్ధారించుకున్నాక ఆ నటుడు వీరెవరికీ సాటి రాడు, అందుకని వీరి మధ్య అతనికి స్థానం అనవసరమని సంతృప్తి పడ్డాడు. థియేటర్ వాడి మరో పొదుపు చిట్కా మధ్యమధ్యలో ఏసీ ఆపివేయటం మాత్రం నాకూరికే ఉక్కపోసేలా చేసింది. ఇక సినిమా కథలోకి వస్తే, కైజూలనబడే గ్రహాంతరవాసులు సమీప భవిష్యత్తు(అంటే 2017 ప్రాంతంలో) పసిఫిక్ సముద్రం అడుగులోని మహాద్వీపాంతర భూతల పొరలనుండి పైకి వచ్చి తీరనగరాలను నాశనం చేస్తాయి. నాశనం అంటే అలా ఇలా కాదు; ఏకంగా శాన్‍ఫ్రాన్సిస్కో లోని వంతెనని కూల్చివేయడం లక్షల మంది జనాభాను చంపేయటం వగైరా. ఈ తెలీని వింత జంతువులను కట్టడి చేసి మట్టుబెట్టేందుకు భారీ స్థాయిలో యేగర్ అనే మహామఱమానవులని నిర్మించి, వాటిని నియంత్రించేందుకు ఇద్దరు మనుషులను పైలట్లుగా ఉంచి, వారి మెదడుల్లోని ఆలోచనలను ఒకరిది మరొకరితో మిళితం చేసి ఆ వచ్చిన మహా మస్తిష్క శక్తి ద్వారా ఈ యేగర్లను నడుపుతారు. (ఒంటరి పైలట్ తో చేసిన పరిశోధనలలో ఒక మనిషి మెదడు తట్టుకోలేక పోతే, ఆ యేగర్ యంత్రం కుడి భాగం ఒకరు, ఎడమ భాగం ఒకరు నియంత్రించేలా అదే సమయంలో ఒకరి ఆలోచనలు మరొకరు అన్వయించుకునేలా సిద్ధం చేస్తారు శాస్త్రజ్ఞులు). మొదట్లో కైజూలు ఒక మోస్తరుగా పుష్కరానికి ఒకటి చ్ప్పున, తర్వాత్తర్వాత మరింత తక్కువ వ్యవధిలో దాడులు చేయటం మొదలు పెడతాయి. ఈ యేగర్లు కూడా మొదట్లో కైజూలను సమర్ధవంతంగా ఎదుర్కొన్నా, తర్వాత్తర్వాత కైజూలు యేగర్ల దాడులకి తగ్గట్టూ సిద్ధమయి రావటం మొదలుపెడతాయి. దాంతో ప్రపంచ నాయకుల సమాఖ్య యేగర్లను రద్దు చేసి తీరాల్లో గోడలు కట్టడం మొదలుపెట్టడానికి మొగ్గు చూపుతుంది. ఆ గోడల నిర్మాణం అయ్యే వరకూ రక్షణగా మిగిలిన నాలుగు యేగర్లను నియమిస్తారు. కానీ ఆ నాలుగిటినీ నడిపేందుకు సమర్ధమయిన వారు లెక్కకు సరిపోరు. దీంతో యేగర్ల కూతగాడు(కమాండర్) స్టాకర్ పెంటకోస్ట్ ఒక ప్లాన్ ను రూపొందించి అణుశక్తితో కైజూలను చంపాలని పథకమేస్తాడు. కొన్నేళ్ళ క్రితం కైజూను మట్టుపెడుతూ యేగర్ ను నడుపుతున్న వారిలో ఒకడయిన రాలీ బెకెట్ ను ఆశ్రయిస్తాడు పెంటెకోస్ట్. అదే పోరులో తన అన్నను పోగొట్టుకుని అతని ఆలోచనల సంఘర్షణలో యేగర్ ప్రాజెక్ట్ ను వదిలి గోడ కడుతున్న సిబ్బందిలో మామూలు కూలీగా ఉన్న రాలీ పెంటేకోస్ట్ అభ్యర్థన మేరకు తిరిగి వచ్చేందుకు, యేగర్ ను నడిపేందుకు ఒప్పుకుంటాడు. హాంగ్ కాంగ్ వద్ద ఉన్న గోడ కట్టే ప్రదేశం, పక్కనే ఉన్న యేగర్ల ప్రయోగశాలకు వెళతారు. అక్కడ మాకో మొరి అనే అమ్మాయి రాలీకి తారసపడుతుంది. ఆవిడని తన పక్కన యేగర్ కోపైలట్ గా ఎంచుకుంటాడు రాలీ. వీరిద్దరూ యేగర్ లోకి ప్రవేశించినప్పుడు ఆమె ఆలోచనలలో మిళితమయినపుడు ఆమె గతం గురించి తెలుసుకుని, ఆమె పెంటెకోస్ట్ పెంచుకున్నామె అని తెలుసుకుంటాడు. రెట్టించిన ఉత్సాహంతో యేగర్లను తుదముట్టించేందుకు సిద్ధమవుతాడు. అదే సమయంలో కైజూలపై పరిశోధన చేస్తున్న ఇద్దరు వైజ్ఞానికులు తమ పరిశోధన ఫలితాలను తెలిపి విస్తుపోతారు. న్యూటన్ గిజ్లర్ ఒక న్యూరోశాస్త్రజ్ఞుడు తన మెదడులోని ఆలోచనలను యేగర్లో జరిగే పద్ధతిలో కైజూమెదడుకి అనుసంధానం చేస్తాడు తద్వారా కైజూలను తుదముట్టించే ఉపాయం ఇస్తాడు. మొత్తానికి పెంటెకోస్ట్ ప్రాణార్పణ, రాలీ మికోల యేగర్ లోని అణు బాంబుతో శత్రు కైజూ స్థావరాన్ని పూర్తిగా నాశనం చేసి వీరిద్దరూ బయట పడటంతో సినిమా సుఖాంతమవుతుంది. అయితే ఎంతటి సాంకేతిక కల్పనయినా సాంకేతిక పరిమితులను 70లలోకి తీసుకుపోయి చూపించడం నాకు నచ్చలేదు. రాబోయే రోజుల్లో సాంకేతికంగా ఆయుధాలు సినిమాలో చూపించిన దానికంటే ఎన్నో రెట్లు మెరుగ్గా, మానవరహితంగా తయారవుతాయని ఇట్టే ఊహించొచ్చు. మొత్తం మీద బావుంది!

Tuesday, June 4, 2013

నిర్వాణ షట్కము

మనో బుద్ధ్యహంకార చిత్తాని నాహం,
న చ శ్రోత్ర జిహ్వే, న చ గ్రాణ నేత్రేః,
న చ వ్యోమ భూమిర్, న తేజో న వాయు,
చిదానంద రూపా శివోహం, శివోహం.

న చ ప్రాణ సంజ్ఞో, న వై పంచ వాయుః,
న వా సప్త ధాతుర్, న వా పంచ కోశ,
న వాక్ పాణి పాదం, న చోపస్థ పాయుః,
చిదానంద రూపా శివోహం, శివోహం

న మే ద్వేష రాగౌ, న మే లోభ మోహౌ,
న మే వై మదో నైవ మాత్సర్య భావః,
న ధర్మో న చార్ధో, న కామో న మోక్షః,
చిదానంద రూపా శివోహం, శివోహం

న పుణ్యం న పాపం, న సౌఖ్యం న దుఃఖం,
న మంత్రో న తీర్థం, న వేదా న యజ్ఞః,
అహం భోజనం, నైవ భోజ్యం న భోక్తా,
చిదానంద రూపా శివోహం, శివోహం

న మే మృత్యు శంకా, న మే జాతి భేదా,
పితా నైవ, మే నైవ మాతా, న జన్మః,
న బంధుర్ న మిత్రం, గురుర్ నైవ శిష్యః,
చిదానంద రూపా శివోహం, శివోహం

అహం నిర్వికల్పో నిరాకార రూపో,
విభూత్వస్చ సర్వత్ర సర్వేంద్రియణాం,
న చా సంగతం, నైవ ముక్తిర్ న మేయా,
చిదానంద రూపా శివోహం, శివోహం


Thursday, April 18, 2013

నిరంజన రాముడు


ఎటువంటి మచ్చ లేని వాడయిన(నిరంజనుడయిన) రాముడే విశిష్టమయినవాడు. మిగితా అంతా మలినమయినది. సృష్టి కళంకితమయింది. ఓంకారమూ కళంకితమే. అశుద్ధత ఈ అపవిత్రతను ఇంకా వ్యాపించేలా చేస్తోంది. విధి అయిన బ్రహ్మ, శంకరుడూ, ఇంద్రుడూ అందరూ కల్మషులు. గోవిందుడు-గోపికలతో పాటూ కళంకితుడు.
మాట-పాట-నృత్యం అశుద్ధాలు. వేదాలు కళంకితమయినవి. చదువు, పాఠం, నేర్పు, పాట, నృత్యం గ్రంథ-పుస్తకాలన్నీ మలినమయినవి.
జ్ఞానం అందరి నోళ్ళలో పడి చెడిపోయింది. కానీ రాముడు మాత్రం మలిన రహితుడు, కళంక రహితుడు, కల్మష రహితుడు. ఇదే కబీరు వాక్కు. 

Tuesday, April 2, 2013

రైళ్ళలో ఉచిత వైఫై సాధ్యాసాధ్యాలు


బిజినెస్ లైన్, హిందూ పత్రిక కథనం ఆధారంగా, రైళ్ళలో ఉచిత వైఫై సదుపాయం నేటితో ప్రారంభమయింది. మొట్టమొదటగా ఢిల్లీ-హౌరా రాజధాని ఎక్స్ప్రెస్‍లో ఈ సేవలను ప్రారంభించిన భారత రైల్వే వారు సంవత్సరాంతానికల్లా మరో 50 బళ్ళలో ఈ సదుపాయాన్ని అందిస్తామని పేర్కొన్నారట. ఈ సౌకర్యం అందుబాటులోకి వచ్చిన తరువాత రైలు ప్రయాణికులు అంతర్జాలంలోని వివిధ జాలగూళ్ళనూ చూడటం, వేగులు పంపించుకోవటం, చాట్, యూట్యూబు వంటి దృశ్యక సేవలు ఇంకా జాలపు ఆటలు కూడా ఆడుకోవచ్చు. ప్రస్తుతానికి 4ఎంబీపీఎస్ దింపుకోలు వేగం, 512కేబీపీఎస్ ఎక్కింపు వేగం సామర్థ్యంతో ఈ సేవలు అందుబాటులోకి వస్తాయట. భారతదేశపు కంపెనీ అయిన టెక్నోసాట్‍కమ్ ఈ సదుపాయాన్ని అందిస్తోన్న ప్రైవేటు కంపెనీ. ఈ-మెయిల్స్(వేగులు) ఇంకా ఆన్‍లైన్ ట్రాన్సాక్షన్స్(జాలపు అమ్మకాలు,కొనుగోళ్ళు) మొదటి ప్రాధాన్యత ఇవ్వబడే సేవలు. అంటే ఒకే సమయంలో ఆ 4Mbps ను రైలులో ఉన్న వాడుకరులకి సమానంగా పంచి ఇచ్చినా(సగటున 100 ప్రయాణీకులు వాడితే, ఒక్కొక్కరికి 400 Kbps వేగంతో నెట్ వస్తుంది), మిగితా సేవలు వాడే వారికి తక్కువ వేగం, పై రెండు సేవల వారికీ ఎక్కువ వేగం కల్పిస్తారుట. అలానే అశ్లీల జాలగూళ్ళు(porn sites)ను పూర్తి స్థాయిలో నిలిపివేస్తారుట. టోరెంట్ వంటి సేవలు కూడా నిలిపివేస్తారట.

సాంకేతిక వివరాలు : 
సాటిలైట్ ఆధారంగా 2G-3G హైబ్రిడ్ ఇంకా వైఫై ఆధారంగా ఈ సేవలు అందుతాయి. సాటిలైట్ అందుబాటులో ఉన్నంత వరకూ 2G-3G, సాటిలైట్ అందుబాటులో లేని అత్యవసర సమయాల్లో వైఫై రౌటర్ల ద్వారా జాలం అందుబాటులో ఉంటుంది కాబట్టీ 99శాతం జాల సంపర్కం ఉంటుంది. సాటిలైట్ ఆంటెనాను పవర్ రేక్ పై అమర్చుతారు. ఇది ప్రతి కోచ్ కు వైఫై రేడియోల ద్వారా అనుసంధానం చేయబడి ఉంటుంది.   కోచ్ వెలుపల ఉండే యాక్సెస్ పాయింట్ల ద్వారా ఇది ప్రయాణీకునికి చేరుతుంది.
రక్షణ:
ప్రభుత్వ శాఖయిన టెలికాం వారి సూచనల మేరకు ప్రతి ఒక్క వెబ్ కదలిక పంజీ చేయబడుతుంది. ప్రయాణీకులు తమ ఫోన్ నంబర్ తో పాటూ పీఎన్నార్ సంఖ్య, ప్రభుత్వం జారీ చేసిన ఏదయినా గుర్తింపు పత్రం(ఎన్నికల గుర్తింపు పత్రం లేదా ఆధార్ మొ॥) అందజేస్తే ఈ సేవలకు కావల్సిన సంకేత పదం ఇస్తారు. సంకేతపదం లేనిదే ఈ సేవను అనుభవించలేము. ఆ సంకేతపదం ఎసెమెస్ గా ఫోన్ కు వస్తుంది. త్వరలో ఇంటర్నెట్ టీవీ కూడా అందుబాటులోకి రానుందట.
ఈ తతంగమంతా వటానికి ఖర్చు దాదాపు రూ॥ 6.3 కోట్లట. ఈ సేవలు రాజధాని, శతాబ్ది ఇంకా దురొంతో రైళ్ళకు పొడిగిస్తారట.

ఇక సాధ్యాసాధ్యాల విషయానికి వస్తే, 
భారతీయులు మిక్కిలి(చాలా) వెధవతెలివి గలవారు. ఏదయినా సేవను సొంత ప్రయోజనలాకు వాడుకోక మానరు. రైళ్ళలో బాత్రూం అద్దం నుండీ కిటికీ కడ్డీల వరకూ తస్కరించే బాపతు మనం! ఈ విధమయిన దొంగతనాల నుండి ఎలా ఆయా రౌటర్, అంటెనాలను కాపాడుకుంటారో రైల్వే వాళ్ళు తేల్చుకోవాలి.
ఇక సేవల దుర్వినియోగంలోనూ మనమే అగ్రులం, మహాభారతం రామాయణం పేర్లతో porn చూడటం వీసీఆర్ల కాలంలోనే ఉంది. ఇక porn బ్లాక్ చేయటం అనేది ఈ విధంగా దాదాపు అసాధ్యం.
టారెంట్లు నిలుపు చేయటం ఒక విధంగా వ్యర్థమే, టారెంట్లు లేకపోతే నేరుగా వీడియోలు డౌనులోడ్ చేస్తారు, అందువల్ల ఇంకా బ్యాండ్ విడ్త్ పై ఎక్కువ భారం పడుతుంది.
ప్రస్తుత కథనాల ప్రకారం ఎలాంటి రక్షణలు కల్పిస్తున్నారో తెలీదు, అందువలన ప్రయాణీకుల క్రెడిట్ కార్డు, బ్యాంకు వివరాలు మొదలు ఈ-మెయిలు సంకేత పదాలు వరకూ బలహీన మరియు సున్నిత సమాచారం ఎప్పుడూ తోటి క్రేకర్ ప్రయాణికుల చేతుల్లో పెట్టి నెట్ వాడతన్నామని గమనించాలి.
ఎంత గట్టి రక్షణకయినా విరుగుడు క్షణాల్లో కనిపెట్టే సామర్థ్యం ఇండియన్ బ్లాక్ హాట్ క్రేకర్లకు గలదన్న విషయం రైల్వే వారూ ఇంకా ముఖ్యంగా ప్రయాణికులు గుర్తించాలి.
ఎంత అత్యవసరమయినా బ్యాంకింగ్ వంటి సేవలు వాడకపోవటమే సబబు.
ఇంకా దాదాపు 1000 మంది ప్రయాణికులు ప్రతి ట్రెయినులో ప్రయాణిస్తున్నపుడూ, కనీసం 500 మంది అయినా నెట్ వాడతారు, అలా 4 Mbps, ఎందుకూ సరిపోదు.
నేటి రైలు ప్రయాణాల్లో క్షుణ్ణంగా గమనిస్తే, ప్రతి 5గురిలో ఒకరు లేప్‍టాపు. ప్రతి 3గురిలో ఇద్దరు స్మార్ట్ ఫోన్ తో ఉన్నారు. అందుచేత నెట్ సౌకర్య్వంతం కాకుండా, ఇంకా ఎక్కువ తలనొప్పిగా మారటం మాత్రం ఖాయం.
ప్రత్యేకంగా చెప్పుకోదగినది పీఎన్నార్ సంఖ్య. పీఎన్నార్ సంఖ్య ఒక్కటికి ఒకే పాస్ వర్డ్ ఇస్తే, 6గురు ఒక్క సంకేతపదంతో లాగిన్ అవడం-దీనిని ఎలా సాధ్యపరుస్తారో చూడాలి.
ఈ విధంగా భారతీయ ప్రయాణికునికి ఈ సౌకర్యం సేవకన్నా పేద్ద తలనొప్పే!

Monday, February 11, 2013

నీవు మాయ ద్వారా సృష్టించబడ్డావా? లేక నీవే మాయను సృష్టించావా?


ನೀ ಮಾಯೆಯೊಳಗೊ
ನಿನ್ನೊಳು ಮಾಯೆಯೊ
నీవు మాయ ద్వారా సృష్టించబడ్డావా?
లేక నీవే మాయను సృష్టించావా?

ನೀ ದೇಹದೊಳಗೊ
ನಿನ್ನೊಳು ದೇಹವೊ
నీవు శరీరంలోని అవయవానివా?
లేక శరీరమే నీలో ఒక భాగమా?

ಬಯಲು ಆಲಯದೊಳಗೊ
ಆಲಯವು ಬಯಲೊಳಗೊ
(బయట లోపలుందా? లేక లోపల బయటుందా?)
శూన్యం ఇంట్లో ఉందా?
లేక ఇల్లు శూన్యంలో ఉందా?

ಬಯಲು ಆಲಯವೆರಡು
ನಯನದೊಳಗೊ
లేక ఈ ఇల్లు ఆ శూన్యం రెండూ చూసే కంట్లో ఉన్నాయా?

ನಯನ ಬುದ್ಧಿಯೊಳಗೊ
ಬುದ್ಧಿ ನಯನದೊಳಗೊ
ఈ కళ్ళళ్ళో బుద్ధి ఉన్నదా?
లేక బుద్ధిలో కళ్ళు ఉన్నాయా?

ನಯನ ಬುದ್ಧಿಗಳೆರಡು
ನಿನ್ನೊಳಗೊ ಹರಿಯೆ
లేక ఈ రెండూ-కళ్ళు ఇంకా బుద్ధి నీలోనే ఉన్నవా?

ಸವಿಯು ಸಕ್ಕರೆಯೊಳಗೊ
ಸಕ್ಕರೆಯು ಸವಿಯೊಳಗೊ
తీపిదనం పంచదారలో ఉందా?
లేక పంచదార తీపిదనంలో ఉందా?

ಸವಿಯು ಸಕ್ಕರೆಗಳೆರಡು
ಜಿಹ್ವೆಯೊಳಗೊ
లేక ఈ పంచదార, ఆ తియ్యదనం రుచి చూసే నాలుకలో ఉన్నాయా?

ಜಿಹ್ವೆ ಮನಸಿನೊಳಗೊ
ಮನಸು ಜಿಹ್ವೆಯೊಳಗೊ
ఆ నాలుక మనసులో ఉందా?
లేక మనసు నాలుకలో ఉందా?

ಜಿಹ್ವೆ ಮನಸುಗಳೆರಡು
ನಿನ್ನೊಳಗೊ ಹರಿಯೆ
లేక ఆ నాలుకా, ఈ మనసు నీలో ఉన్నాయా?

ಕುಸುಮದೊಳು ಗಂಧವೊ
ಗಂಧದೊಳು ಕುಸುಮವೊ
పూవులలో సువాసన ఉందా?
లేక సువాసనలో పూవులున్నవా?

ಕುಸುಮ ಗಂಧಗಳೆರಡು
ಘ್ರಾಣದೊಳಗೊ
లేక వాసన చూసే ముక్కుపుటల్లో ఆ పూలూ, ఇంకా సువాసన ఉన్నాయా?

ಅಸಮಭವ ಕಾಗಿನೆಲೆಯಾದಿಕೇಶವರಾಯ
ಉಸುರಲೆನ್ನಳವಲ್ಲ ಎಲ್ಲ
ನಿನ್ನೊಳಗೊ
నేను చెప్పలేకపోతున్నాను
కాగినెలెలోని ఆదికేశవా!
ఇవన్నీ నీ ఒక్కడిలోనే ఉన్నాయా?



రచన : కనకదాసు
తెలుగు అనువాదం : రహ్మానుద్దీన్ షేక్

చంద్రకళ గారి పొడిగింత :


భాష లో మాధుర్యం ఉందా , మాధుర్యం లో భాష ఉందా ?
లేక ఆ భాష, ఆ మాధుర్యం,  వినగలిగే చెవుల్లో ఉన్నాయా?

ప్రేమ లో స్పర్శ ఉందా ? లేక స్పర్శ లో ప్రేమ ఉందా ?
లేక ఆ ప్రేమ , ఆ స్పర్శ , ముట్టుకుని చేతుల్లో ఉన్నాయా ?


Sunday, January 27, 2013

విద్యార్థులకి వికీపీడియా

విద్యార్థులు-బడికెల్లేవారయినా, కాలేజీకి వెళ్ళేవారయినా- వికీపీడియాను ప్రాథమికంగా ఒక విజ్ఞాన నిధిగా వాడుకుంటున్నారు.
కానీ ఈ పోకడను విద్యానిపుణులు, అలానే ఉపాధ్యాయులు మొదలు ఆచార్యులందరూ విరోధిస్తున్నారు, గమ్మత్తయిన విషయమేమిటంటే ఆ ఉపాధ్యాయులు కూడా వికీపీడియానే. కారణలేమయినా కానీ, సమగ్రంగా ఉన్న విషయాలను కాకుండా వివిధ మూలాల నుండి విషయ సంగ్రహం కావాలి అన్నదే వీరి ఉద్దేశ్యం-చాలా సందర్భాలలో.
కొందరు గురువుల ప్రకారం నిత్యం మార్పులు చెందుతూ ఉండేది వికీపీడియా కనుక ఇది వాడకూడనిది!
సరే, విద్యార్థులు వికీపీడియా గురించి తెలుసుకోవలసిన విషయాలు కొన్ని పరిశీలిద్దాం :
1. ప్రతి ఒక్కరూ నిత్యమూ వికీపీడియాను వాడతారు. ఇందుకు ఉపాధ్యాయులూ మినహాయింపు కారు. ఏదయినా విషయం గురించి అవలోకనం చేసుకునేందుకు ఇది చాలా మంచి వనరు. సాధారణంగా ఇది దోషరహితంగా, విస్తారంగా ఇంకా తాజా సమాచారంతో నిండిన అంశాలను అందిస్తుంది.
2. ఇది ఎవరో కొందరు విద్యావేత్తలు తూతూ మంత్రంగా రాసి పడేసిన పరిశోధనా పత్రాలు కావు. కానీ ఆ పరిశోధనా పత్రాలను మీరు ప్రామాణికంగా చూపవచ్చు. అదే వికీపీడియాను ఈ విధంగా ప్రామాణికంగా వాడలేము. నిజానికి అమెరికాలో కొన్ని విశ్వవిద్యాలయాలు వికీపీడియాను ప్రామాణిక వనరులుగా వాడటంపై నిశేధం విధించాయి. గమనించాల్సిన విషయమేమిటంటే ముద్రిత ఎన్సైక్లోపీడియానూ, నిఘంటువునూ, వార్తా పత్రికను, బ్లాగునూ మొ॥వాటిని వనరులుగా వాడరాదు.
3. వికీపీడియా నిబంధన ప్రకారం ప్రతి వ్యాసమూ కచ్చితంగా ప్రామాణిక వనరులను చూపాలి. ఆ విధంగా ఒక విషయం గురించి పరిశోధన చెయ్యాలనుకునేవారు, వికీపీడియాలో ఆ వ్యాసం యొక్క ప్రామాణిక వనరులు(మూలాలను) వాడి పరిశోధన మొదలుపెట్టవచ్చు.
4. వికీపీడియాలోని వాక్యాలను నేరుగా అభ్యాసాల్లో, ప్రకరణ పత్రాల్లో, పరిశోధన పత్రాల్లో రాయటం బుద్ధి తక్కువ పనే అవుతుంది.
5. ముందుగా పరిశోధనకు సంబంధించిన వ్యాసాలను వికీపీడియాలో అభ్యసించి, వాటి చర్చలను క్షుణ్ణ్ణంగా పరిశీలించి ఆపై మీ పరిశోధనలను మొదలు పెట్టవచ్చు. ఇది మీ పరిశోధనలో భాగంగా కూడా చేసుకోవచ్చు.